ဒီနေ့
သောကြာ နေ့
သခင်ယေရှုကို ကားစင်တင်လိုက်တဲ့နေ့ ။
ငါဟာ
Firday 13 သဘောင်္ကြီးလို ရေချလိုက်တာနဲ့
အစအနပျောက်သွားတော့မှာလား
နပိုလီယံ နဲ့ ဟားဗတ်ဟူးဗားလို
သောကြာနေ့ကိုကြောက်တဲ့ကောင်လား
ရုစဗဲ့လို လည်း သောကြာကိုတွေးကြောက်နေမယ်ဆိုရင်
သောကြာသမီးလေးရေ
မင်းနဲ့ငါ
ရင်ခုန်သံထပ်တူကျဖို့ဆိုတာ
ဘယ်ရှိနိင်ပါတော့မလဲ
သောကြာ မလေးရေ
ရောက်လာမယ့်မနက်ဖြန်ဟာ
သောကြာ နေ့ တဲ့ နဂါးပြည်ပြဿဒါး
သိဟ်ရာသီသို့ပြောင်း၍
ဘီလူးဘေးတွေ့အံ့ ဆိုလား
ကဲ
ဘာဆက်လုပ်ကြမှာလဲ
တွေးကြောက်နေလို့မဖြစ်ဘူး
သီအိုရီအပြည့်နဲ့ပုံသေနည်းကျကျ
ငါတို့ ချစ်ခြင်းတွေ
အပေါစားမဆန်စေရဘူး ။
ဒီလိုနဲ့ပဲ
နရီတွေ လွဲ ရမ်သမ်တွေမှားပြီးရင်းမှား
စံတော်ချိန်တွေသူခိုးအခိုးခံရ
အသက်ရှုလိုက်တိုင်းရင်ခုန်သံတစ်ချို့ကမောက်ကမဖြစ်
ခက်ထန်မာကျောမှုတွေ
တအိအိပြိုဆိုင်း
ကြာလာတော့လည်း
မှော်ဆရာလိုစိတ်ကူးမျိုးနဲ့
ပြက္ခဒိန်တွေ လုံးခြွေလွင့်ပစ်လိုက်ချင်တယ် ။
သောကြာ မလေးရေ
နောက်ထပ်
ထပ်ပြီး....ထပ်ပြီး
ထပ်ခါ....ထပ်ခါ
ရောက်လာမယ့်
သောကြာနေ့တွေကို အလျားလိုက်ဖြန့်ခင်း
ငါတို့ရဲ့ ရင်ခုန်သံတွေကို ဒေါင်လိုက်ဖြစ်ဖြစ်
ရေပြင်ညီအတိုင်းဖြစ်ဖြစ်
အပျိုရည်မပျက်စနစ်တကျထုပ်ပိုး
ကကြိုးတွေစည်းချက်ညီစွာ
ဟာမိုနီကျကျ ဟစ်အော်ကြမယ် ။
တူညီတဲ့ကာရန်မဲ့စကားလုံးတစ်ချို့ကို
နှလုံးသားရဲ့တွင်းနက်နက်ထဲ
ယုံကြည်စွာပစ်ချရင်း
ပင့်ကူမျှင်ဖုံထူထူတွေကြားက
ရုန်း......ထွက်
သောကြာမလေးရေ
ဗဟိုချက်တံခါးကိုစိတ်လိုလက်ရတွန်းဖွင့်ရအောင် ။
....ကဲ....
ဒီနေ့
သောကြာ နေ့
ငါတို့နှစ်ယောက်ကို စီရင်ချက်ချမယ့်နေ့ ။
မွေးနေ့ရှင် သောကြာမလေးသို့ အမှတ်တရ ခံစားသီကုံးသည်
No comments:
Post a Comment