10/09/2009

ရွှေဆံပင်တံတားအတွက် ရွှေဆံပင်များလှူဒါန်းလျှက်ရှိနေ

ရန်ကုန်မြို့၊ကျောင်းဆရာမကြီးတစ်ဦးက ဆံနွယ်စများလာရောက်လှူဒါန်းနေစဉ်
ဆံပင်လှူဘို့ရန် အတွက် ဖြတ်ညှပ်နေကြစဉ်
ရွှဆံပင်များနှင့် အခြားများ လှူဒါန်းလိုပါက လမ်းတံတား အကျိုးတော်ဆောင် ဆရာတော် ဦးဝေပုလ္လ၊ ဖုံး-၀၉-၂၀၃၀၇၂၈၊ ၀၉-၅၁၅၁၃၉၇၊ အရှင်ရာဇိန္ဒ၊ ဖုံး-၃၈၄၃၆၃၊ (မောင်မင်းစိုး၊ရွှေနံ့သာ) အမှတ်(၆)၊ ရွှေပိဋကတ်တိုက်၊ အာဇာနည်လမ်း၊ ရွှေတိဂုံ ဘုရားအရှေ့ဘက်မုဒ်အနီး၊ ဗဟန်း၊ ရန်ကုန်နှင့်၊ အရှင်ဥာဏိဿရ၊ ဖုံး-၀၉-၂၀၁၁၆၀၇၊ တိပိဋကမဟာဂန္ဓာရုံကျောင်းတိုက်၊ အရှေ့ဝါယာလက်(၂)လမ်း၊ ရေးကူး၊ ကမ္ဘာအေး၊ မရမ်းကုန်းမြို့နယ်-သို့ တိုက်ရိုက် ဆက်သွယ် လှူဒါန်းနိုင်ပါကြောင်း အသိပေးအပ်ပါသည်။
မောင်မင်းစိုး
စစ်ကိုင်းတိုင်း၊ယင်းမာပင်၊ပုလဲမြို့နယ်အတွင်းရှိ အလောင်းတော်ကဿပနှင့် အမေရေယာဉ်နန်းရင်းသို့ သွားရာ ပင်မလမ်းမကြီးဖြစ်သော လည်ငေါက်၊ ချင်ပြစ်သို့သွားရာလမ်းကြီးအတွင်းမှာ တည်ဆောက်မည့် ရွှေဆံပင်တံတား ဆောက်လုပ်ဖို့ အမျိုးသမီးတွေဟာ မိမိတို့ အမြတ်တနိုးထားတဲ့ ဆံပင်တွေ ဖြတ်လှူနေကြတယ်။ တော်တော်လေးလည်း ဝမ်းသာကြည်နူးမှုတွေ ဖြစ်မိပါတယ်။ ဒါကြောင့် လှူဒါန်းကြတဲ့ အမျိုးသမီးအားလုံးတို့ကို ဂုဏ်ပြုတင်စား ချင်တာကတော့ ကမ္ဘာမှာ ဒို့မြန်မာမိန်းကလေးတွေသာ လုပ်နိုင်တဲ့၊ လုပ်ခဲ့ကြတဲ့ အလှူဒါနပွဲကြီး ဖြစ်ပါပေတယ်လို့ တင်စားလိုက် ချင်ပါတယ်။ အခုဆို ရန်ကုန်ရွှေမြို့သူတွေပါ ၀င်လာမစဲဆိုပါတော့။ ဟုတ်တယ်၊ ဒါဟာ အင်မတန်မြင့်မြတ်တဲ့ အလှူဖြစ်တယ်။ ဘုရားအလောင်း သူတော်ကောင်းတွေ လုပ်ခဲ့တဲ့ အလှူ ဒါနမျိုးလည်းဖြစ်ပါတယ်။ အင်္ဂပရိစ္စာဂ-ဆိုတဲ့ ခန္ဓာကိုယ် အစိတ်အပိုင်းတွေကို ဖြတ်တောက်ပြီး အများသူငါ သွားလာရေးမှာ လွယ်ကူချောမွေ့စေအောင် မြင့်မြတ်တဲ့အလှူဒါနကို မြင့်မြတ်တဲ့စိတ်ထား ပိုင်ရှင်ဖြစ်တဲ့ မြန်မာမိန်းကလေး တွေရဲ့ မွန်မြတ်တဲ့ အလှူပွဲပေါ့နော်။ ဒီပင်္ကရာဘုရားရှင်သွားမယ့် လမ်းခရီးတစ်ခုမှာ မိမိတာဝန်ယူထားတဲ့ လမ်းနေရာ မပြီးလို့ ခန္ဓာကိုယ်ကို လမ်းအဖြစ် အသုံးပြုစေပြီး လှူဒါန်းမှုပြုခဲ့တဲ့ သုမေဓာရှင်ရသေ့ ကိုတောင် ပြေးပြီးမြင် ယောင်မိပါတယ်။ ဒီကိစ္စမှာပဲ ဒီပင်္ကရာဘုရားရှင်က ဗုဒ္ဓဘာသာဝင်တွေ အခုကိုးကွယ်နေတဲ့ ဂေါတမဗုဒ္ဓ ဘုရားရှင် ဖြစ်လာမယ့် သုမေဓာရှင်ရသေ့ကို ဗျာဒိတ်တော် ပေးခဲ့တယ်မဟုတ်လား။ အခုလည်း တကယ်လို့သာ ဂေါတမ ဘုရားရှင်ကိုယ်တော်မြတ်ကြီးသာ သက်ရှိထင်ရှားရှိနေ ဦးမယ်ဆိုရင် ''ချစ်သမီးတို့၊ ဒီကုသိုလ်ဟာ အင်မတန်မွန်မြတ်တဲ့ ကုသိုလ်ဖြစ်တယ်'' စသဖြင့် သာဓုသုံးကြိမ်ခေါ်ပြီး ဂုဏ်ပြုတော်မူခဲ့လိမ့်မယ်လို့ ထင်မိပါတယ်။ လူ့လောကြီးထဲရောက်လာတော့ တကယ်လူဖြစ်ရကျိုး နပ်ဖို့ဆိုတာ ကိုယ်ရရှိပိုင်ဆိုင်ထားတဲ့ ခန္ဓာကိုယ်ကြီးနဲ့၊ အ စိတ်ပိုင်းတွေနဲ့ လောကကြီး၊ လူသားကောင်းကျိုးအတွက် ငါဘာတွေ လုပ်ပေးနိုင်မလဲ။ ဘာတွေ လုပ်ပေးနေသလဲ၊ ဘာတွေလုပ်ပေးခဲ့ဦးမလဲ-စတဲ့ မေးခွန်းတွေမေးမြန်းပြီး ကိုယ်တိုင်လူ့အဖြစ်ကိုရရှိတာ အကျိုးရှိရဲ့လားဆိုတာ တိုင်းတာ စေချင်တာ။ အခုတော့ အလှူရှင်များဖြစ်တဲ့ အချို့မိန်းကလေးများဟာ ရုပ်ဝတ္ထုပိုင်းဆိုင်ရာ ဆင်းရဲကောင်း ဆင်းရဲကြပါလိမ့်မယ်။ ဒါပေမယ့် စိတ်ပိုင်းဆိုင်ရာမှာတော့ အင်မတန်မွန်မြတ်တဲ့ လူတွေဖြစ်နေကြပါပြီ။ အခုဆို အမြတ်တနိုး ထိန်းသိမ်းထားခဲ့တဲ့၊ အနှစ်နှစ်အလအလ ကြာရှည်စွာ စောင့်ရှောက်ခဲ့ကြရတဲ့ ဆံနွယ်စလေးတွေကို အများသူငါသွားလာမယ့် လမ်းခရီးမှာ ဖြတ်တောက် လှူဒါန်းတယ်ဆိုတာ တော်တော်လေးကို စိတ်ထားမြင့်မြတ်ကြလို့ပေါ့။ မိန်းတို့ဘုန်း ဆံထုံး-ဆိုသလို ဘုန်းဖြစ်တဲ့ ဆံထုံးကို လှူဒါန်းတယ်ဆိုတော့ အင်မတန်ကြီးမြတ်တဲ့ စိတ်ထားရှိနေလို့ပေါ့၊ ဒါကြောင့် ဒီလိုဘုန်းဖြစ်တဲ့ ဆံထုံးကို လှူဒါန်းရတဲ့အတွက်ကြောင့် ဘုန်းကံကြီးတဲ့ ဘဝပိုင်ရှင်ကို အခုရော၊ နောက်ဘဝ များစွာမှာပါ ပိုင်ဆိုင်ရပါလိမ့်မယ်။ ဒီလမ်းကြီး တည်ရှိနေသရွေ့ ဒီအလှူရှင်တွေရဲ့ နာမည်တွေဟာ ဘယ်တော့မှ ပျောက်ကွယ်မှာ မဟုတ်ပါဘူး။ တံတားကြီး သဘာဝဘေးအန္တရာယ်တစ်ခုခုနဲ့ တကယ်လို့ပျက်စီးသွားခဲ့ရင်တောင် ဒီလမ်းကြီးမှာရှိတဲ့ ဒီတံတားကြီးရဲ့ လားရာ၊ လာရာဟာ ဘယ်တော့မှ မှုန်ဝါးသွားမှာ မဟုတ်ပါဘူး။ ဒီတော့ ဒီလမ်းကြီးမှာရှိတဲ့ တံတားကြီးအတွက် လှူဒါန်းလိုက်ရတဲ့ မွန်မြတ်ဆံနွယ်လေးတွေကို ဖြတ်တောက်ပြီး ပါဝင်လှူဒါန်းခွင့်ရလို့ အတိုင်းမသိပါဘဲ ဝမ်းသာကြည်နူး မှုတွေဖြစ်လို့ သာဓုအတန်တန် ခေါ်မိလိုက်ပါတယ်။

No comments:

Post a Comment